Управата за финансиска полиција поднесе кривична пријава до Основното јавно обвинителство во Тетово против вработен на Универзитетот во Тетово, поради сомнение за злоупотреба на службена положба и фалсификување документи.
Според Финансиската полиција, обвинетиот А.З., вработен како виш соработник за логистика и теренска работа, во периодот март 2020 – февруари 2023 година, е осомничен за проневера на пари што студентите му ги предале за учество, кофинансирање и други трошоци за студирање.
Наместо да ги уплати средствата на сметката на универзитетот преку платформата E-pay, тој е осомничен дека ги чувал за себе, незаконски стекнувајќи околу 3.362.272 денари со што и на Универзитетот во Тетово му е нанесена финансиска штета.
За да го прикрие кривичното дело, тој е осомничен дека изготвил фалсификувани потврди за плаќање, кои им ги доставувал на студентите како доказ дека плаќањата се извршени.
Според истрагата, за да ги фалсификува документите, тој користел податоци и QR-код од вистинска потврда за плаќање преку E-pay, а потоа го менувал името на плаќачот, износот и датумот на плаќањето.
Студентите, верувајќи дека плаќањата се извршени, ги доставувле овие документи до електронскиот систем на универзитетот и до студентската служба.