Поранешниот бугарски премиер и актуелен лидер на владејачката партија ГЕРБ , Бојко Борисов, остро го критикуваше претседателот Румен Радев и го обвини – за поделба на нацијата.
„Не разбирам зошто толку време трошиме коментирајќи политички лидер на неостварена партија. Радев се загрева веќе 8 години и не се осмелува да скокне. Нека престане да ја користи претседателската институција како приватна авиокомпанија и нека излезе да се бори против нас.
Секоја негова изјава е раздор за нацијата, нема никаква врска со обединувач на нацијата“ – изјавил Борисов, меѓу другото, во врска со инсистирањето на претседателот Радев, во Бугарија да се одржи референдум за воведување на еврото и влез на Бугарија во Еврозоната.
„Само ние успеваме да ве водиме по европскиот пат на развој. Ги видовме дизајнерот Асен Василев, Петков, Денков (поранешни премиери – н.зз), тие не побараа конвергентен извештај, не побараа она што го побаравме и добивме“, коментираше Борисов.
Тој ја обвини партија „Продолжуваме со промените“ дека е единствената што може да го спречи конечното прифаќање на Бугарија во еврозоната.
Борисов тврди дека претставници на „Продолжуваме со промената“ се на турнеја низ европските земји за да ја исплашат Бугарија да не ја прифати еврозоната.
„Само една земја е доволна за да не бидеме примени“, коментираше Борисов. Конечната одлука за прием на Бугарија во монетарната унија се очекува на 8 јули.
Според Борисов, редовната влада е многу подобро слушната во Брисел отколку дома, а по приемот на Бугарија во еврозоната, владата ќе може да се фокусира на развој на економијата, стимулирање на инвестициите и зголемување на приходите.
Радев бара референдум за воведување на еврото, Борисов вели – тоа е опасно!