Додека и Македонија се соочува со недостиг од работна сила и зголемена миграција на работници, најновите податоци од Хрватска покажуваат силна побарувачка за странска работна сила. Од почетокот на годинава до 30 ноември, во Хрватска се издадени над 160 илјади дозволи за престој и работа за странски државјани, што уште еднаш ја потврдува регионалната конкуренција за работници и притисокот врз пазарите на трудот во земјите од Западен Балкан, вклучително и Македонија.
Од почетокот на годината до 30 ноември, вкупно 160.176 дозволи за престој и работа се издадени на странски работници во Хрватска, според статистиката на МУП. Од вкупниот број издадени работни дозволи, 76.700 од нив се однесуваат на нови вработувања.
64.009 од нив се за продолжување на постојните дозволи, додека 19.467 дозволи се издадени за сезонска работа, објавува „Јутарњи“.
Најмногу дозволи за престој и работа им се издадени на граѓани на БиХ (30.188), по што следат Непал (29.579) и Србија (23.145). По неа следуваат Филипините (16.195), Индија (14.500) и Македонија (11.384), а во првите десет се и Косово (5.860), Египет (5.149), Узбекистан (5.161) и Бангладеш (3.183).
Најмногу дозволи се издадени во јануари, а продолжувања во ноември.
Во меѓу време, Хрватска воведува значајни промени во системот за вработување на странски работници со цел воспоставување подобра контрола, намалување на нелојалната конкуренција и сузбивање на нелегалните практики, објави ХРТ. Измените на Законот за странци воведуваат построги здравствени услови и го поттикнуваат учењето на хрватскиот јазик, а статистиката покажува дека оваа година, и покрај помалиот број издадени работни дозволи, бројот на осигурени лица е зголемен, што укажува на подобро планирање од страна на работодавачите.
Според предлогот, граѓанин на трета земја ќе мора со барањето за прва дозвола за привремен престој да приложи потврда за здравствена состојба и статус на вакцинација, кои не смеат да бидат постари од 90 дена.
Исто така, секој кој сака да работи во Хрватска ќе треба добро да го говори хрватскиот јазик, што се смета за основа за интеграција на странските работници.
- Ние го олеснивме учењето јазици, кофинансирано од Европскиот социјален фонд, но одѕивот беше слаб. Не постои ниво на свест што е потребно за да се убедат работниците да го научат јазикот – вели државниот секретар на Министерството за труд и пензиски систем Иван Видиш и додава дека граѓаните со право очекуваат лицето да покаже барем почетен интерес за јазикот.
Хrватска, исто така, ја зголемува контролата на вработувањето на странци со цел да го намали дивото вработување и да обезбеди подобро регулиран пазар на трудот.
- Системот е подобро контролиран и за странските работници и за работодавачите – вели Видиш.
Според него, Хрватска годинава евидентирала 17% помалку работни дозволи во споредба со истиот период минатата година, но во исто време 10% повеќе регистрирани работници во Хрватскиот институт за пензиско осигурување.