Албанскиот премиер Еди Рама на отворањето на Самитот „Планот за раст на ЕУ“ во Тирана порача дека Западен Балкан никогаш не доживеал реформи од ваков обем: со 490 милиони евра од ЕУ се трансформираат јавните финансии, енергетиката, инфраструктурата и сите клучни сектори.
„Регионот се стреми да расте со Европа, а не на сметка на Европа. Ние не молиме да влеземе во ЕУ – ние секој ден докажуваме дека заслужуваме да бидеме дел од неа“, рече Рама.
Тој го истакна Коридорот 8 како „артерија на Европа“ и безбедносен коридор за НАТО, нагласувајќи дека Западен Балкан не е набљудувач, туку фактор во европската архитектура. „Од опасност се движиме кон можност“, додаде тој.
Рама најави дека до крајот на 2026 година регионот ќе има заеднички дигитален идентитет, а од 2027 година ЕУ ќе нè „достигне“ во овој процес. Побара и целосно олеснување на граничните премини – „од пречки да станат мотори на развој“.
„Луѓето не чувствуваат интеграција – тие чувствуваат пониски трошоци, полесно патување, подобри работни места и слобода на движење. Планот за раст е нашиот патоказ – не кон Брисел, туку кон слободите на европскиот пазар“, заклучи Рама.