Едно дете загина, а седуммина други се потешко повредени во страшна сообраќајна несреќа што се случила рано изутрина околу 3:30 часот на автопатот Нови Сад – Белград, во близина на наплатната рампа кон српската престолнина. Во несреќата е тешко повреден и 43-годишниот возач на комбето.
Според Министерството за внатрешни работи на Србија, комбе „Опел Виваро“ со белградски регистарски ознаки излетало од коловозот, пробило заштитна ограда и паднало во канал.
Во комбето имало осум малолетници од 13 до 16 години, членови на џудо-клубот „Партизан“ од Белград. Тие се враќале од меѓународен спортски камп и натпревар во Азербејџан. Едно дете, родено во 2009 година, починало на местото на несреќата, а седумте повредени се префрлени во Институтот за здравствена заштита на деца и млади во Војводина.
„Во сообраќајната несреќа се повредени седум деца на возраст од 13 до 15 години. Две се сместени на одделението за интензивна нега, едно дете има повреда на цервикалниот ‘рбет и е транспортирано во Белград, а друго беше подложено на хируршка интервенција под општа анестезија. Останатите се во стабилна состојба и под лекарски надзор“, изјави за РТС докторката Андреа Ѓуретиќ од новосадската Детска болница.
Возачот, идентификуван како С.С. (1982), е преместен во Ургентниот центар на Клиничкиот центар Војводина со повеќе трауматски повреди. По дијагноза и интервенција, тој е под постојан лекарски надзор. Алкотестот покажал дека не бил под влијание на алкохол.
На местото трае увид предводен од јавен обвинител, за да се утврдат точните причини. Првичните информации велат дека комбето изгубило контрола веднаш по наплатната рампа, од засега непознати причини.
Трагедијата предизвика шок и длабока жал во белградската спортска заедница. Од џудо-клубот „Партизан“ сè уште нема официјално соопштение, но членовите и тренерите упатуваат сочувство до семејството на загинатото дете и молитви за оздравување на повредените.
View this post on Instagram