Српското Министерство за внатрешни работи денес соопшти дека при редовна проверка на поштата во зградата на Владата на Србија, во коверт адресиран до вицепремиерот и министер за внатрешни работи, Ивица Дачиќ, биле пронајдени три куршуми.
При скенирањето на пратката со рендгенски уред, било откриено дека во пликот се наоѓаат куршуми.
Истрагата покажала дека пликот бил предаден на 26 август во поштата во Пожаревац.
Полицијата го идентификувала и го лоцирала лицето што го предало пликот, а во тек е понатамошна истрага за расветлување на сите детали поврзани со случајот.
Министерството за внатрешни работи на Србија истакна дека презема сите законски мерки и активности за да се обезбеди безбедноста на граѓаните и државните институции.