Некогашниот тренер на Металург и на ракометната репрезентација на Македонија, Лино Червар, со нетрпение го очекува спектаклот утревечер од 19 часот во СЦ „Јане Сандански“, на кој ќе продефилираат ракометните легенди од Македонија и од Европа.
„Секој ден размислувам за Македонија, мојата втора татковина. Многу сум среќен што сум овде и што имам можност да се сретнам со многу лица кои помогнаа да бидам ова што сум денес. Среќен сум што Македонија има министерство за спорт, а негов прв човек е мојот некогашен играч Борко Ристовски. Овде се чувствувам како дома. Спортот е единственото нешто кое може да ги спои луѓето. Соперниците стануваат пријатели. Затоа, мораме да ги учиме децата да практикуваат спорт и да го јакнат тимскиот дух. Така ќе израснат во здрави личности“, изјави еден од најтрофејните ракометни тренери во историјата на прес-конференција за утрешната ревија од големи ракометни имиња во Скопје.