Фудбалската федерација на Македонија (ФФМ) со најостра осуда го коментира инцидентот што се случи за време на натпревар од младинските категории (генерации 2009/10) меѓу екипите на Брегалница и Шкупи. Група родители на гостинските фудбалери влегоа на теренот и физички нападнаа дел од играчите на домашниот тим.
Ова однесување е апсолутно неприфатливо и претставува сериозно кршење на принципите на спортскиот дух, фер-плејот и безбедноста на младите фудбалери. Особено загрижува фактот што едно дете претрпело тешки повреди, вклучително и скршеници, како резултат на нападот.
ФФМ објави дека надлежните органи ќе започнат дисциплинска постапка и ќе преземат соодветни санкции против сторителите. Исто така, ќе биде покрената постапка против ФК Шкупи и одговорните лица, со цел да се спречи повторување на вакви недозволиви и опасни инциденти.
Федерацијата нагласува дека било каков облик на насилство на спортските терени е строго забранет и ќе биде ригорозно казнет. Во однос на насилството, без разлика од кого или на кое ниво, нема да има толеранција.
Нашата заедничка обврска е да создадеме безбедна и позитивна средина за развој на најмладите генерации фудбалери.