Фудбалерите на Тиквеш приредија големо изненадување на отворањето на шестото коло во Првата македонска фудбалска лига, нанесувајќи му го првиот пораз на досега перфектната Шкендија, и тоа со уверливи 3:1 на тренинг-центарот на ФФМ во Скопје.
Симултанка против лидерот одигра 21-годишниот напаѓач од Гвинеја, Н’фанли Сила, кој запиша хет-трик со головите во 19., во 60. и во 72. минута, со кои изби на врвот на листата на стрелците со 7 погодоци.
Единствениот гол за тетовските „црвено-црни“ во 67. минута го постигна косовскиот играч за врска Дрилон Ислами, кој десет минути подоцна беше исклучен поради втор жолт картон.
Шкендија останува лидер со 15 бода, а Тиквеш се искачи на второто место со 11 пред одигрувањето на преостанатите средби од ова коло: Скопје – Башкими (сабота, 16:30 ч.), Струга – Силекс (понеделник, 16 ч.) и Вардар – Арсими (понеделник, 19 ч.).