Тензиите меѓу Каракас и Вашингтон достигнаа врв откако портпаролката на Белата куќа, Каролин Ливит, изјави дека претседателот Доналд Трамп е подготвен да ги искористи „сите расположливи средства“ во борбата против нарко-картелите, вклучително и можноста за воена интервенција во Венецуела.
САД ги испратија бродовите „USS San Antonio“, „USS Iwo Jima“ и „USS Fort Lauderdale“, со околу 4.500 војници, вклучувајќи 2.200 маринци, кои се очекува да пристигнат во близина на брегот на Венецуела во недела наутро.
Како одговор, венецуелскиот претседател Николас Мадуро прогласи масовна мобилизација на милицијата(4.5милиони), нагласувајќи ја потребата од заштита на националниот суверенитет.
– Одлучив дека овој викенд е клучен за спроведување попис и мобилизација на сите милиции, резервисти и граѓани, мажи и жени, кои се спротивставуваат на империјалистичките закани – изјави Мадуро.
Оваа мобилизација е дел од „Планот за заштита на суверенитетот и мирот“, кој предвидува зајакнување на народната милиција, цивилната одбрана и одговор на психолошката војна, преку активности организирани во воени единици, локални штабови и градски плоштади.
Мадуро истакна дека меѓународното право ја забранува употребата на сила против суверени држави, а Венецуела доби поддршка од Русија, Кина, Иран и земјите од Боливарската алијанса, кои остро ги осудија заканите од САД.