Шпанскиот милијардер Amancio Ortega, коосновач на модниот бренд Zara и сопственик на групацијата Inditex, денес важи за најбогатиот инвеститор во недвижности на глобално ниво, откако изгради империја вредна околу 25 милијарди долари, пренесе Forbs.
Само во ноември минатата година, Ортега плати околу 850 милиони долари во готово за историската зграда на Canada Post во Ванкувер – објект што се простира на цел градски блок и е изнајмен на технолошкиот гигант Amazon. Оваа трансакција постави рекорд како најголема продажба на деловен простор во Канада.
Во текот на една година, Ортега инвестирал повеќе од 3 милијарди долари во недвижности во 10 градови и 8 земји, купувајќи деловни згради, хотели, индустриски објекти, луксузни трговски комплекси и станбени кули, како и удел во британски пристанишен оператор. Вкупно, од 2001 година наваму, вложил околу 24 милијарди долари во повеќе од 200 имоти во речиси 100 пазари.
Неговиот имотен портфолио денес е поголем од оној на познати инвеститори како Larry Ellison и Ken Griffin, а ја надминува и вредноста на портфолијата на најголемите класични градежни магнати. Ортега, кој потекнува од скромно семејство и ја започнал кариерата како продавач на кошули на 14-годишна возраст, ја изградил својата модна империја со основањето на Zara во 1975 година. По излегувањето на Inditex на берза во 2001 година, тој започнал агресивно да инвестира во недвижности преку својата холдинг-компанија Pontegadea.
Неговата стратегија значително се разликува од другите инвеститори – купува врвни, престижни објекти на најатрактивни локации, најчесто без задолжување, и речиси никогаш не ги продава. Дел од неговите најпознати инвестиции се облакодерот Torre Picasso во Мадрид, Devonshire House во Лондон, како и деловни комплекси во Сиетл и Торонто.
Голем дел од овие објекти се изнајмени на водечки светски компании како Apple, Meta, Nike и Spotify, што му обезбедува стабилен и долгорочен приход. Покрај инвестициската стратегија, недвижностите му служат и како даночна оптимизација. Шпанските закони овозможуваат значителни олеснувања доколку средствата се вложени во активен бизнис, што му помогнало да заштеди стотици милиони долари даноци во последните децении.
И покрај огромното богатство, компанијата Pontegadea има само околу 90 вработени, а управувањето е концентрирано во тесен круг на семејството. Со оглед на тоа што оваа година се очекува да добие рекордна дивиденда од 3,8 милијарди долари од Inditex, аналитичарите сметаат дека Ортега ќе продолжи со агресивни инвестиции, дополнително зацврстувајќи ја својата позиција како најмоќен играч на глобалниот пазар на недвижности.