Случајот со осомничениот за убиството на познатиот говорник Чарли Кирк доби драматичен пресврт кога цимерот и партнер на осомничениот, кој е трансродова личност им предал на истражителите серија текстуални пораки разменети на денот на убиството, пренесува Ројтерс.
Цимерот се допишувал со 22-годишниот партнер Тајлер Робинсон, осомничен за убиството, за кого обвинителите од Јута најавија дека ќе побараат смртна казна.
Во преписката, Робинсон директно ја признава ликвидацијата, објаснувајќи ја како акт на отпор против, како што рекол, „омразата“ на Кирк.
Робинсон: Што и да правиш, сопри и погледни под мојата тастатура.
(цимерот наоѓа ливче на кое пишува: „Добив шанса да го симнам Чарли Кирк и ќе ја искористам.“)
Цимерот: Што? Се шегуваш, нели?
Робинсон: Сè уште сум добро, љубов моја, но заглавив во Орем уште малку. Не би требало долго да се задржам, ама морам да ја земам пушката. Искрено, се надевав дека ова ќе остане тајна до гроб. Жал ми е што те вклучив во ова.
Цимерот: Не си го направил тоа, нели?
Робинсон: Го сторив тоа. Жал ми е.
Цимерот: Мислев дека веќе фатија некој?
Робинсон: Не, фатија некој стар лудак, а потоа испрашуваа друг што бил во слична облека. Планирав веднаш потоа да ја земам пушката, ама целиот тој дел од градот е блокиран. Тивко е, речиси доволно за да излезам, ама има едно возило што стои таму.
Цимерот: Зошто?
Робинсон: Зошто го направив тоа?
Цимерот: Да.
Робинсон: Доста ми беше од неговата омраза (на говорникот Чарли Кирк). За некои работи нема преговарање. Ако успеам незабележливо да ја земам пушката, нема да оставам никаков траг. Ќе се обидам повторно да стигнам до неа, се надевам дека се тргнале. Не видов дека нашле нешто.
Цимерот: Колку долго го планираше ова?
Робинсон: Нешто повеќе од една недела, мислам. Можам да ѝ се доближам (на пушката), ама има паркирано полициско возило покрај неа. Мислам дека веќе го пребарале тоа место, ама не сакам да ризикувам.
Робинсон: Требаше да се вратам и да ја земам веднаш штом стигнав до колата… Се плашам што ќе направи татко ми ако не ја вратам дедовата пушка… Не знам ни дали има сериски број, ама не би ја имал до мене. Се плашам за отисоци – морав да ја оставам во грмушка каде што се пресоблеков. Немав можност ни време да ја понесам со себе… Можеби ќе морам да ја оставам и да се надевам дека нема да најдат отисоци. Како (пцовка) да му објаснам на татко ми дека ја изгубив… Единственото нешто што го оставив беше пушката завиткана во пешкир…
Се сеќаваш како ги гравирав куршумите? Тие пораки (со пцовки) се главно мемиња, шеговити пораки. Ако на „Фокс Њуз“ ја видам таа порака, ќе добијам мозочен удар. Океј, ќе морам да ја оставам, навистина е (пцовка)… Според ова што се случи денеска, би рекол дека дедовата пушка функционира одлично. Мислам дека оној телескопски нишан чинеше околу 2.000 долари.
Робинсон: Избриши ја оваа преписка.
Робинсон: Тато сака фотографии од пушката… Вели дека дедо сака да знае кој што има, агентите објавија фотографија од пушката и многу е специфична. Ми ѕвони сега, не се јавува.
Робинсон: Откога се врати Трамп, (татко ми) стана тврдокорен поддржувач на движењето МАГА.
Робинсон: Ќе се предадам доброволно, еден од соседите тука е заменик шериф.
Робинсон: Само за тебе се грижам, љубов моја.
Цимерот: Многу повеќе се грижам за тебе.
Робинсон: Те молам, не разговарај со медиумите, не давај интервјуа, ниту изјави… Ако те праша нешто полицијата, барај адвокат и молчи.
Додека американската јавност ја очекува разврската за убиството, осомничениот Робинсон не зборувал многу на првото онлајн рочиште, освен што си го потврдил името.
Обвинителството објавило дека тие имаат низа текстуални пораки од него до партнерката/цимерот во кои признава дека го убил Чарли Кирк.