Белата куќа објави дека воведува нови царини од 50 отсто на голем број производи од Канада, потег кој дополнително ги заострува трговските односи меѓу САД и еден од нивните клучни партнери. Американскиот трговски претставник Џејмисон Грир информираше дека новите финансиски оптоварувања ќе опфатат канадски увоз вреден околу 20 милијарди американски долари, а мерката е предвидено да стапи на сила на 19 август, точно 30 дена откако претседателот Доналд Трамп ќе го потпише указот.
Вашингтон ја нарече ваквата одлука директен одговор на дискриминаторската, нерамноправна и неоправдана царинска политика која ја спроведува Канада и оти основната цел е преку овие царини да ги подобри условите за извоз на автомобили кои се произведени во Соединетите Американски Држави. Оваа мерка е само најнова во низата ескалации во трговскиот спор меѓу двете соседни земји, имајќи предвид дека Трамп и во текот на својот втор мандат ги користи царините како главно оружје, континуирано обвинувајќи ги Канада и другите партнери за нетранспарентни трговски односи.
Канадскиот премиер Марк Карни во својата синоќешна реакција нагласи дека ова е последна во низата еднострани мерки на САД кои претставуваат директно кршење на Договорот меѓу САД, Мексико и Канада и рече дека Отава не ја затвора вратата за дипломатија и е подготвена за дополнителни разговори со Вашингтон за надминување на ситуацијата. Дополнително, кажа дека Канада веќе доставила конкретни предлози за решавање на спорот и изрази подготвеност за дополнително интензивирање на дијалогот со американската администрација.