Сопругата на поранешниот венецуелски претседател Николас Мадуро, Силија Флорес, на своето прво појавување пред федералниот суд во Њујорк изјави дека не е виновна по обвиненијата што ѝ ги припишуваат американските власти.
Флорес беше уапсена заедно со Мадуро во американската воена операција во Каракас на 3 јануари 2026 година и сега се соочува со сериозни кривични обвиненија.
На рочиштето, нејзиниот адвокат соопшти дека Флорес претрпела телесни повреди за време на апсењето, вклучително модринки во пределот на ребрата. Тој истакна дека таа ќе добие соодветна медицинска грижа и дека клиентката е во стабилна психичка состојба и подготвена за долг судски процес.
Флорес тврди дека обвиненијата против неа се неосновани и дека САД неправедно ја поврзуваат со делата што ѝ се ставаат на товар на нејзиниот сопруг. Николас Мадуро е обвинет за заговор за нарко-тероризам, шверц на кокаин, поседување автоматско оружје и експлозивни направи, како и за нелегално здружување со цел извршување кривични дела.
Следното рочиште е закажано за 17 март, кога одбраната најави дека ќе бара целосен увид во постапката и доказниот материјал.
Случајот се следи со големо внимание во САД, бидејќи претставува преседан – сопружници на поранешни државни лидери ретко се наоѓаат пред американските судови по вакви обвиненија. Поддржувачите на Мадуро продолжуваат да тврдат дека станува збор за политички мотивирана акција.
Судењето на Флорес и Мадуро се очекува да биде еден од најзначајните меѓународни правни процеси во наредниот период, со оглед на политичката тежина и обвиненијата поврзани со трговија со дрога и безбедносни закани.