НАТО ќе има решавачка предност во воздухот и тоа може да одигра клучна улога за резултатот од евентуална воена конфронтација меѓу Алијансата и Русија, е заклучокот на анализата од американскиот непрофитен тинк-тенк за глобална политика „РАНД корпорација“ нарачана од Военото воздухопловство на САД.
Таков потенцијален судир значително би се разликувал од тековниот судир во Украина поради тоа што „прво и можеби најважно, воздушната надмоќ на НАТО веројатно би го нарушила позициониот застој карактеристичен за сегашните копнени операции во руско-украинската војна“.
Посебно внимание е посветено на лекциите што ги научија САД и нивните сојузници од војната во Украина во текот на изминатите три години. Меѓу нив е заостанувањето на земјите од НАТО во употребата на мали беспилотни летала и технологии за електронско војување, кои станаа решавачки за борбените дејства меѓу Русија и Украина.
Покрај тоа, експертите ја забележуваат сериозната ранливост на Западот, што произлегува од неможноста на одбранбената индустрија на НАТО да произведува муниција во потребниот обем, посебно во споредба со можностите на Русија. И покрај овие тешкотии, сепак, Алијансата задржува опиплива супериорност во однос на својата ударна моќ, се нагласува во извештајот на РАНД.
Според сценаријата моделирани од аналитичарите, доколку Русија нападне земја-членка на НАТО и искаже територијални претензии кон неа, воената акција брзо ќе ескалира во акутна фаза. Како одговор, САД и сојузничките сили ќе почнат контраофанзива за враќање на изгубената територија. Во првите денови, Русија веројатно ќе може да ги нападне силите на НАТО, но потоа, како што се нагласува во извештајот, „Алијансата ќе постигне воздушна доминација над Источна Европа“.
Неутрализирањето на рускиот систем за воздушна одбрана, според експертите на РАНД, ќе отвори пат за активно извидување и прецизни напади. Авионите на НАТО ќе можат да ги следат движењата на непријателот, да идентификуваат слаби точки и да извршат масовни удари врз командни пунктови, логистички центри и маневрирачки борбени единици. Сето ова, сметаат аналитичарите, ќе му овозможи на НАТО да ја преземе иницијативата за кратко време.
Во исто време, авторите на извештајот предупредуваат на опасноста од неконтролирана ескалација. „Конфликт со таков интензитет би можел да ескалира во нуклеарна војна, особено ако руските трупи претрпат неприфатливи загуби или акциите на НАТО се сметаат за закана за територијалниот интегритет на Руската Федерација“, се вели во документот.
Извештајот намерно не ги разгледува сценаријата што вклучуваат употреба на нуклеарно оружје. Студијата се фокусира исклучиво на динамиката на конвенционалното војување.
„РАНД корпорацијата“ прецизира дека моделирањето е спроведено во контекст на растечката загриженост во рамките на НАТО за подготвеноста на блокот за можен конфликт. Разузнавачките служби на Алијансата постојано предупредуваат дека Кремљ би можел да започне воен напад врз земја-членка на НАТО во следните пет години.