Турските власти му забранија на крузер наменет за американски ЛГБТК+ патници да пристане во турските пристаништа, повикувајќи се на „моралните стандарди“ и „семејните вредности“.
Крузерот „Од Атина до Венеција“, организиран од компанијата „Атлантис евентс“, требаше да пристане во Кушадаси на 7 јули, а потоа и во Истанбул. Меѓутоа, турските власти го откажаа „настанот“, наведувајќи дека бродот е изнајмен за група „позната по однесување што не е во согласност со општественото ткиво и моралните вредности на нашата земја“.
Бродот „Скарлет Лејди“ е во сопственост на компанијата „Вирџин војаџис“ на британскиот милијардер Ричард Бренсон. Од „Атлантис евентс“ соопштија дека наместо во Турција, крузерот ќе пристане во Каиро (Египет) и на грчкиот остров Крит.
Претседателот и извршен директор на „Атлантис евентс“, Рич Кембел, изјави дека одлуката е „прилично шокантна“.
„Образложението едноставно е дека станува збор за геј група. Многу ме загрижува кога некоја држава одлучува на кои туристи ќе им дозволи влез“, рече Кембел.
Тој додаде дека ова е првпат во 36-годишното постоење на компанијата некоја држава експлицитно да им забрани пристап поради „кои се“.
Според податоците, од вкупно 1.900 патници, околу 1.100 се од САД, а останатите од Велика Британија, Канада, Австралија и други земји. Патувањето е опишано како „епска авантура“ по медитеранските острови.
Во последните години, владејачката партија на Реџеп Таип Ердоган (АКП) зазема сè построг став кон ЛГБТК+ заедницата. Од 2015 година во Турција се забранети парадите на гордоста во Истанбул.