Вечерва, 13 мај, во Базел почнува 69тото издание на Песна на Евровизија. Водителки на годинашниот избор ќе бидат Хејзел Бругер и Сандра Студер. Во првото полуфинале ќе се натпреваруваат 15 земји, а ќе настапат и претставниците на Италија, Шпанија и Швајцарија.
Јувал Рафаел, претставничката на Израел на Евровизија, доживеа непријатности и закани во последните денови во Базел. Учеството на Израел на Евровизија оваа година привлече огромно внимание, а во неделата во Базел се одржаа протести против учеството на земјата на натпреварот.
Израелскиот радиодифузер „Кан“ денес поднесе пријава до полицијата во Базел во врска со наводни закани со смрт кон израелската претставничка Јувал Рафаел, пренесува Блиц.
Имено, на натпреварот учествуваат 37 земји, а за време на парадата со тиркизниот тепих во неделата, Јувал беше пречекана со исвиркувања, а на видео снимено од член на израелската делегација, се гледа како еден човек мавта со палестинско знаме и покажува палец надолу, а потоа го поминува прстот низ грлото и плука. Овој гест беше протолкуван како закана со смрт, а од полицијата во Базел беше побарано да го истражи случајот.
На учеството на Израел на Евровизија се спротивставија и јавните радиодифузери во Шпанија, Исланд и Словенија, како и 70 поранешни учесници на натпреварот.
Во неделата, на 11 мај, претставниците од 37те земји учеснички на „Евросонг 2025“ се појавија на тиркизнот тепих, а оваа година тој е долг 1,3 километри. Пред почетокот на годинашниот музички натпревар, повеќе од 70 поранешни евровизиски натпреварувачи, вклучувајќи ги и победниците, потпишаа отворено писмо до Европската радиодифузна унија (ЕБУ) во кое побараа Израел да биде исфрлен од натпреварот.
- Ја разбираме загриженоста и длабоко вкоренетите мислења околу актуелниот судир на Блискиот Исток. ЕБУ не е имуна на глобалните случувања, но заедно со нашите членови, нашата улога е да обезбедиме натпреварот да остане универзален настан којшто промовира врски, различност и вклученост преку музиката. Сите ние се стремиме да ја одржиме „Евровизија“ позитивна и инклузивна и да му покажеме на светот што би можело да биде, а не нужно она што е, соопшти ЕБУ.
Израелската претставничка на „Евровизија“, Јувал Рафаел викендов беше пречекана со демонстрации во Базел поради што израелската телевизија „Кан“ поднесе пријава до тамошната полиција. Рафаел треба да настапи во втората полуфинална вечер в четврток. Јувал Рафаел, која го преживеала нападот на Хамас врз Израел, победи на израелскиот фестивал „Нова“ за учество на годинашниот „Евросонг“.
Една од највпечатливите претставнички на овогодинешната Евровизија е претставничката на Малта Миријана Конте. Таа победи на Евровизија во Малта (MESC) 2025 и ќе ја претставува земјата со песната „Serving“. Миријана победи со песна првично насловена како „Kant“, што на малтешки значи пеење. Малта беше принудена да го промени името на својата песна за изборот откако Европската радиодифузна унија (EBU) побара измени поради потенцијално недоразбирање во врска со англиски збор што има навредливо значење. Оваа година, Малта ќе настапи во втората полуфинална вечер на 15 мај.
Македонија годинава по третпат не учествува на настанот. Земјава последен пат учествуваше на Евровизија во 2022 година, во Италија, кога наша претставничка беше Андреа. Прв претставник на Евровизија беше Владо Јаневски и песната „Не зори, зоро“ во 1998 година.