Припадници на српското Министерство за внатрешни работи и германската царинска управа во Минхен спроведоа заедничка истрага против криминална група, осомнена за набавка, криумчарење и продажба на дрога на територијата на Европската Унија и Србија. Како што соопшти српското МВР, соработката започнала на почетокот на 2025 година, кога во Германија, при рутинска контрола на автомобил, биле запленети 16,5 килограми кокаин, а биле приведени две лица.
Натамошната истрага утврдила поврзаност со криминална група која дејствувала во германската покраина Северна Рајна-Вестфалија.
Врз основа на интензивната размена на информации меѓу српските и германските истражители, германската полиција спроведила акција во која биле уапсени Б.П., Д.Ј. и Ф.У., а при претресите биле запленети 636 килограми кокаин и две парчиња огнено оружје.
Во рамки на истата истрага, на територијата на Србија досега се уапсени седум лица и се запленети 35,6 килограми наркотични средства.
Од српското МВР оценуваат дека акцијата претставува уште една потврда за меѓународната соработка во борбата против трговијата со дрога и најавуваат продолжување на активностите за откривање и процесуирање на припадници на вакви криминални мрежи.