Турција ќе воведе продажба на тутунски производи само со презентирање на лична карта, објави заменик-министерот за здравство на Турција, Суајип Биринџи.
Мерката треба да го ограничи пристапот на малолетниците до штетниот производ и генерално да го намали пушењето.
Турција е светски вицешампион во употребата на тутунски производи по Индонезија која е на првото место.
Пушачите пушат во просек по 17 цигари дневно, според податоците презентирани од Биринџи на здравствен конгрес.
И уште пошокантни информации – трошоците на турските домаќинства за тутунски производи изнесуваат 15 милијарди турски лири годишно (283,4 милиони евра), а штетата од пожари предизвикани од неизгаснати отпушоци од цигари е околу 75 милиони евра.
„И покрај сите овие негативни аспекти, употребата на тутунски производи продолжува да се зголемува, и тоа значително кај младите луѓе“, коментираше Биринџи. Според него, ниските цени на цигарите во земјата придонесуваат за високата потрошувачка.