Основното јавно обвинителство (ОЈО) Скопје поведе постапка против четири лица осомничени за тешка кражба и сквернавење гроб кои на 17 септември од Алејата на заслужни граѓани на градските гробишта во Бутел успеале ја да откорнат бронзената биста од платформата на гробот на починатите Стале Попов и Бранка Поповска.
При соборувањето на бистата осомничените ја оштетиле и платформа на гробот и го осквернавиле гробното место.
„Откако бистата ја собориле на земја, ја влечеле до жичената ограда каде што претходно направиле отвор и преку отворот ја префрлиле бистата и ја натовариле во автомобил, со намера да ја присвојат“, велат од ОЈО.
Проценетата вредност на бистата изнесува околу 320.000 денари.
За дрската кражба, јавен обвинител до судија на претходна постапка од Основниот кривичен суд Скопје доставил предлог за определување притвор за четворицата осомничени.
За случајот претходно информираше и МВР наведувајќи дека четворицата осомничени на возраст од 22, 26 и 49 години биле приведени попладнето на 17 септември откако во автомобил „пежо“ со скопски регистрации била пронајдена и одземена бронзена биста која претходно ја одзеле од гробиштата во Бутел.