Претседателот на Владата на Република Македонија и лидер на ВМРО ДПМНЕ Христијан Мицкоски укажа на фактот дека од СДСМ ниту демантираат, ниту потврдуваат за врските и парите од Бугарија. На вечерашниот митинг во Струмица во врска со ова тој посочи:
„Не се во состојба да кажат поинаку од она, што сите знаеме дека е вистина. Ќе ви се скинат и куферчињата пари од источниот сосед. Нема среќа ниту во зградите и визите од Дубаи. Им упатувам порака на сите нив: тоа што една година и три месеци сè уште не стигнала правдата до вас, тоа што година и три месеци секој ден, секој час во денот и седмицата го минувам на градење на темелите, што ги уривавте, не значи дека заборавив и оти не работам да ве стигне правдата!“ – рече Мицкоски.
„Го слушам Венко Филипче како зборува дека сум ја штител олигархијата. Целиот мој живот го посветив на книгата и пенкалото и така се градев себеси. И јас во политиката влегов чесно и со искрени намери, и мојата имотна состојба од тогаш до денес е непроменета. А тој, седнат во скутот на неговиот гуру, со хациенда на Водно направена додека е министер, со партнерски зделки со неговиот гуру, кој со чиновничка плата – што како премиер, што како градоначалник – има империја тешка стотици милиони евра.“ – напомна Христијан Мицкоски на митингот во Струмица.
Премиерот и лидер на ВМРО ДПМНЕ Мицкоски посочи дека тука следува логичното прашање: како од едно просечно семејство се стигнува до милиони, какви што тие имаат и со кои располагаат?
„Одговорот го знаете, а резултатот го плаќаме сите ние – се вика разурната држава и систем, што пропаѓа и кој сега мораме да го градиме од неговите темели.“ – кажа Мицкоски.
Мицкоски се осврна на кампањата и спотовите со кои се претставува СДСМ на овие избори.
„Колку и да лажете на спотовите и бледата кампања, што ја имате, не можете да го излажете народот. Таму, во тие спотови и изјави, се скриени сите ваши стравови и потсвести, сите ваши сеништа и скриени пораки. Па така, некни, кога патував на еден од митинзите, гледам спот на СДСМ каде тегнат, влечат еден црвен кабел низ Скопје. Кабелот ги заокружува луѓето од СДС, ги поврзува сите од раководството на СДСМ, и вика – точно, во право се, сите нив ги поврзува еден кабел. И со право – кабелот е неизоставен дел од потсвеста на Венко. Човекот при здрав разум излезе и нè убедуваше дека кабелот, бил виновен што модуларната болница изгорела. А не системот во распаѓање, кој тие со години, а претходно со децении, го уништуваат.“ – нагласи Христијан Мицкоски.
Мицкоски му ја упати следната порака на лидерот на СДСМ: „Венко, кабелот не може да биде никаква иднина, туку само добар слуга на неговите политички господари, на кои им служи со гордост и чест, и не се ни труди да смени нешто.“