„Длабоката реформа во ДУИ, која ја најави повторно избраниот лидер на партијата Ахмети, заврши главно со рокада на истите имиња, од еден орган во друг. На денешниот партиски конгрес Арбер Адеми и Фатон Ахмети ги сменија улогите. Адеми од потпретседател стана генерален секретар, додека Фатон Ахмети од генерален секретар стана потпретседател. Денешниот конгрес наиде на критики од членовите и поранешните членови на оваа партија, кои реагираа преку општествените мрежи, поради нивното исклучување од партиските тела.“ – објави ТВ Алсат.
Натаму телевизијата истакнува: Бујар Османи и Арбана Пашоли остануваат потпретседатели на ДУИ, додека Еркан Арифи и Арта Билали Зендели беа додадени и на листата на потпретседатели. Неби Реџепи го заменува Блерим Беџети на позицијата организациски секретар. Во новиот Генерален совет на партијата не се вклучени сегашните членови Садула Дураку, Талат Џафери, Блерим Беџети, Фатмир Дехари, Назим Буши, Реси Адурахмани, Шабан Мемети, Ејуп Рустеми, Муса Џафери, Џеват Адеми, Ејуп Алими. Сепак, останува да се види дали тие ќе бидат дел од други партиски тела, како што е Националниот совет, за кои се очекува да се консолидираат во наредните денови.
Во својот говор, Ахмети не стави нагласка на реформите во партијата, туку на реформите, што треба да се случат во главните институции на државата, со цел да се гарантира правична застапеност, функционална еднаквост и општествена кохезија, во духот на Охридскиот договор.
„Прво, Избор на Влада со двојно мнозинство – бадинтер во извршната власт. Предлагаме секој нов состав на Владата да ја добие довербата на Собранието не само со мнозинството пратеници, туку и со мнозинството пратеници на немнозинските заедници. Второ, примена на бадинтеровиот принцип во Уставниот суд. Законите, што се одобрени со двојно мнозинство во Собранието, врз основа на бадинтеровиот принцип, не треба да се поништуваат во Уставниот суд без двојно мнозинство и од судиите. Предлагаме измени што ќе овозможат одлуките, кои влијаат врз правата на немнозинските заедници да не се донесуваат без меѓусебен консензус во рамките на Судот. Трето, продлабочување на децентрализацијата и локалната самоуправа. Предлагаме нова фаза на функционална и фискална децентрализација со натамошно префрлање на надлежностите во областите на образованието, здравството, локалниот развој и управувањето со јавниот имот“, изјави Али Ахмети, претседател на ДУИ.
Според ТВ Алсат, Ахмети го повтори на конгресот долгогодишното барање за проверка не само на политичарите, туку и на сите функционери, но и на безбедносните органи. „Поддршка за предлог-законот на ДУИ за проверка со меѓународен надѕор како гаранција за бескомпромисна правда. Истрага за сите носители на јавни функции во последните 34 години: министри, заменици, градоначалници, директори, судии, обвинители и полиција. Верификација на богатството и неговото потекло за секој јавен функционер. Длабинска истрага за процесот на приватизација, што ги создаде недопирливите олигарси. Истрага за активностите на органите на државната безбедност и нивните функционери од 1945 година до денес на ОЗНА, УДБ, СДБ, ДБК, УБК, АНБ.“ – посочи Али Ахмети, претседател на ДУИ, објави ТВ Алсат.