Донеодамнешниот претседател на Венецуела, Николас Мадуро, и неговата сопруга Силија Флорес се сместени одвоено во озлогласениот Метрополитенски притворен центар во Бруклин.
Тие се соочуваат со строги услови и зголемени безбедносни мерки додека се во притвор, јавува Си-Ен-Ен.
Метрополитенскиот притворски центар во Њујорк е познат по своите сурови услови, прекини на електричната енергија и недостиг од персонал.
Федералниот затворски консултант Сем Мангел ги опиша условите без резерва.
„Вистински пекол“, изјави тој за Си-Ен-Ен.
„Климатизацијата е лоша, греењето е лошо. Секој затвореник добива по едно волнено ќебе. Тие спијат на многу тенка комбинација од душек и перница што е дебела два инчи на метална плоча“, додаде тој.
Експертите веруваат дека Мадуро и Флорес се држат во одделни ќелии, изолирани од општата затворска популација.
„Во неговиот случај, тој претставува безбедносен ризик кај општата популација“, објасни Мангел.
„Никој не знае што би можеле да мислат другите затвореници за него, други членови на банди, други членови на картели, па затоа неговото ставање во општата популација во кое било време… мислам дека тоа би претставувало огромен безбедносен ризик за објектот“, додаде тој.
Изолацијата, позната како Специјална единица за домување, значи дека затворениците поминуваат до 23 часа на ден заклучени во своите ќелии, со многу ограничен пристап до надворешни активности.
Хју Харвиц, поранешен директор на Федералното биро за затвори, рече дека двајцата веројатно немаат редовен контакт, освен ако состаноците со нивните адвокати не се совпаднат.
Условите во Метрополитенскиот притворски центар адвокатите и затворениците не се двоумеа да ги опишат како „одвратни“ и „застрашувачки“.
Притворниот центар е опасно место, каде што двајца затвореници беа убиени во 2024 година, а властите се под дополнителен притисок по случајот на Џефри Епштајн, кој изврши самоубиство во друг притворен центар во Њујорк во 2019 година.
Харвиц очекува безбедносните протоколи да бидат исклучително строги.