Зголемувањето, според изјавите по средбата, ќе се реализира во три рати од по 8 отсто годишно (наместо 10 отсто како синдикално барање), а исплатата треба да почне од март, со услов претходно да поминат внатрешните процедури и да се потпишат колективни договори по институции.
Според математиката на премиерот, ако во наредните три години на платата на административните службеници се додаваат по 1.500 денари од растот на минималецот и секоја година овој збир се зголемува за 8 проценти, ако сега платата е 35.000 денари, за три години би била околу 50 илјади денари или повисока за околу 40 проценти.
Претседателот на УПОЗ Трпе Деаноски, изјави дека Владата го прифатила синдикалното барање „не во целост“, но како суштински исчекор го посочи прифаќањето да се исплаќаат и додатоците на плата.
– „Не по 10 проценти, но не ги добивме минатата година. Меѓутоа сега Владата прифаќа да ги исплаќа од сега заедно со почеток од март, на начин на што сите институции во државна управа и правосудство, значи судови, обвинителства, ќе треба да потпишат поединечни колективни договори за да го добијат ова право“, рече Деаноски.
Сега, синдикалците треба да добијат поединечни конечни договори за кои треба да се изјаснат. Деаноски вели доколку колегите прифатат, нема никаква пречка, ако не прифатат Владата ќе добие одговор дека веќе се изгуби една година и вработените можеби ќе бараат повеќе.