Унгарија ќе мора да преговара со Владимир Путин без оглед на промената на владата, изјави Петер Маѓар, лидер на партијата Тиса, која освои мнозинство на неодамнешните парламентарни избори.
„Ќе мора да седнеме на преговарачка маса со рускиот претседател. Географската положба ниту на Русија ниту на Унгарија нема да се промени. Нашата енергетска зависност исто така ќе остане. Ќе преговараме“, рече Маѓар во интервју за локалниот весник „Непсава“, истовремено појаснувајќи дека нема намера да влезе во пријателски дијалог.
Тој истакна дека не сака да ги претставува интересите на Украина во дијалогот со руската страна, како и дека во Унгарија „никој не сака проукраинска влада, сите сакаат проунгарска“, пренесува „Униан“.
Новата унгарска влада нема да учествува во заемот од 90 милијарди евра од Европската Унија за помош на Украина, кој неодамна беше блокиран од сегашниот премиер Виктор Орбан и неговата влада, најави победникот на изборите.
„Ќе преговарам со европските лидери. Се согласувам дека Унгарија треба да биде изоставена од ова. Унгарија е во многу тешка финансиска ситуација, задачата сега е да ги вратиме дома парите што ѝ припаѓаат на Унгарија. Не можеме да си дозволиме да земаме нови заеми сега. Националниот долг на Унгарија се зголеми трипати од 2010 година“, рече Унгарецот еден ден откако партијата на Тиса извојува убедлива победа на парламентарните избори, според порталот Индекс.
Зборувајќи за потенцијалното забрзано пристапување на Украина кон ЕУ, Унгарецот рече дека е невозможно земја во војна да биде примена во блокот.
„Значително мнозинство од земјите-членки не го сметаат ова за можно сценарио. Сите земји-кандидатки мора да поминат низ истиот процес, да преговараат за сите поглавја. Исто така, рековме дека ќе има референдум во Унгарија за тоа дали Европската унија треба да ја прифати Украина, но тоа нема да се случи во следните неколку години, не во следните десет години“, рече Маѓар.
Тој претходно нагласи дека Унгарија ќе биде конструктивен партнер во ЕУ, нагласувајќи дека сака Европа да има „силен глас“. Тој рече дека една од најважните задачи е повторно отворање на фондовите на Европската унија и дека веќе разговарал со претседателката на Европската комисија, Урсула фон дер Лајен.