Претседателот на Регулаторна комисија за енергетика (РКЕ), Ацо Ристов, вели дека во Македонија во последните десет години има бум во инвестирање во енергетскиот систем, особено во ветерната енергија и обновливите извори.
Затоа, како што вели, постои идеја, да се искористи зголеменото производство на електрична енергија од фотоволтаични централи и таа да се вклучи во системот, со цел потрошувачите да имаат поголем бенефит.
„Тоа се такви големи инвестиции, со што практично е дуплиран капацитетот на праизводство на енергија“ рече Ристов во о интервју за Телевизија 24.
„Едно време беше филозофијата дека навечер треба да биде евтина тарифата и тогаш граѓаните да ја користат. Но, сега се сменети работите на пазарот и сега, ако ги погледнете берзите, најскапата енергија е навечер. Имаме хиперпродукција на фотоволтаична енергија, која производителите нема каде да ја пласираат.
Идејата е како да ја менаџираме таа енергија, да ја внесеме преку државниот систем, дали ЕСМ ќе ја откупува, но крајната цел е граѓаните да ја добијат таа евтина енергија. Наместо да биде 0 цената на берзата, да пробаме да изменаџираме, државата да го намали производството од јаглен преку ЕСМ, да ја откупи енергијата од производителите на фотоволтаици преку ден.
И зошто да немаме евтина тарифа пет часа во текот на денот. Не ноќта, туку денски. Бидејќи таа тогаш е евтина на пазарот“,вели Ристов.
За сето ова, како што додаде, потребно е да се направи стручна анализа со Министерството за енергетика, со Владата, со операторите, со дистрибиутерите, со производителите на таа евтина енергија.
Дополнително, Ристов вели дека ако цената во првата блок тарифа е 4,7 денари по киловат-час, тогаш може да се направи целата да биде 3,7 денари по киловат-час.
„Имаме енергија што ја произведува државата, ама не можеме да ја изменаџираме во нов систем. Идејата е како тие тарифи да ги намалиме, односно да ги прилагодиме на новиот енергетски период. Енергетиката бара динамична работа. Идејата на регуларот е како да дојдеме до користење на евтината електрична енергија која Македонија ја произведува како последица на наглото инвестирање во обновливи извори, како ветерот и сонцето“,кажа тој.
Една од опциите што се разгледуваат, според него, е проширување на евтината дневна тарифа од сегашните два на пет часа.
„Ноќната тарифа ќе остане, но можно е да има промена на временскиот период. Ако на пазарот енергијата е скапа од 19 до 22 часот, нека се помести ноќната од полноќ до сабајле.
Но, денски, наместо два, да има пет часа. Сепак, треба да ги видиме резултатите од анализите“, вели тој.
Според него, треба да се најде начин да се мотивираат граѓаните да ја трошат евтината енергија кога таа се произведува, а тоа е преку ден.
Ристов очекува анализите, да бидат направени до крајот на летото.
Ристов на почетокот на месецот најави дека треба да се направи детална анализа на системот со четири тарифни блока за електрична енергија.
Според него, нелогично е да се плаќаат четири цени за ист берзански производ.