Пациентите со мултипла склероза (МС) во Македонија ќе можат да ја примаат терапијата во три регионални центри, наместо исклучиво во Скопје. Ова е дел од пилот-програмата што денеска ја најавија Фондот за здравствено осигурување (ФЗО) и Националното здружение за борба против мултипла склероза.
Директорот на ФЗО, д-р Сашо Клековски, истакна дека пилот-програмата ќе се спроведува во три јавни здравствени установи:
- ЈЗУ Градска општа болница „8-ми Септември“ во Скопје
- ЈЗУ Клиничка болница во Штип (за источниот и североисточниот регион)
- ЈЗУ Специјализирана болница за ортопедија и трауматологија „Св. Еразмо“ во Охрид (за југозападниот регион)
Целта е да се намалат долгите и исцрпувачки патувања на пациентите и да им се обезбеди терапија поблиску до местото на живеење. Од ФЗО потврдија дека ветувањето дадено минатата година е исполнето, а буџетот за лекови за МС во 2026 година е зголемен на 451 милион денари, што ќе овозможи третман за над 1.020 пациенти.
Во моментов во земјава живеат околу 2.500 лица со дијагностицирана мултипла склероза, а во 2025 година регистрирани се 115 нови случаи.
Претседателката на Националното здружение за МС, Ана Карајанова Димитрушева, го поздрави овој чекор како голем напредок и апелираше за поголема општествена солидарност.
Дополнително, здружението промовираше едукативна брошура за планирање на семејство кај жените со МС, по повод алармантните резултати од истражување кое покажа дека многу пациентки се плашат од бременост поради недостиг на информации, а не поради медицинска невозможност.
За симболична поддршка, Археолошкиот музеј на Македонија од вечерва до крајот на неделата ќе биде осветлен во портокалова боја – меѓународниот симбол за мултипла склероза.