Километарски колони, повеќечасовно чекање и нервозни возачи и патници беше сликата на граничниот премин Евзони на македонско-грчката граница за влез во Грција и утрово поради новиот систем со фотографирање и земање отисоци од прсти.
Според грчките медиуми, автомобилите претпладнево чекале два часа, а автобусите повеќе од пет за да влезат од Македонија во членката на Европската Унија.
„Сликата јасно ја прикажува состојбата. Бесконечни колони возила, возачи кои излегуваат од автомобилите, барајќи сенка и свежина, семејства со мали деца кои трпеливо чекаат под жешкото сонце и десетици автобуси, што со часови стојат неподвижни. И покрај интензивните непријатности, климата засега останува мирна и не се забележани посериозни тензии. Сепак, огорченоста е видлива. Многу патници го изразуваат своето разочарување од сликата што ја затекнуваат на влезот во земјата, а некои дури карактеристично велат дека ‘нема повторно да дојдат во Грција’, сметајќи дека е неприфатливо нивниот одмор да започне со повеќечасовно чекање на граница“, пишува солунскиот информативен портал „Тес“.
Заради надминување на метежот, Радио Солун јави дека била дадена наредба да се спроведе стариот систем за проверка за патниците од туристичките автобуси.