Основното јавно обвинителство за гонење на организиран криминал и корупција отвори истрага против четири лица поради сомнежи за злоупотреби при јавна набавка за одржување на хигиената на граничните премини и царинските терминали.
Меѓу осомничените е и Стефан Богоев, поранешен директор на Царинската управа. Покрај него, под истрага се и поранешен помошник-директор на Управата, управител на фирма и вработен во истата компанија.
Според Обвинителството, во периодот од јули 2023 до март 2024 година, преку фаворизирање на одреден економски оператор и ограничување на конкуренцијата, на избраната фирма ѝ била овозможена противправна имотна корист од 18,4 милиони денари.
Обвинителството наведува дека првоосомничениот (Богоев) го искористил своето службено влијание, додека второосомничениот влијаел врз други компании да не учествуваат во тендерот. Исто така, постојат докази за примање и давање награда за противзаконито влијание – 111.600 денари.
Обвинителот ќе побара мерка притвор за четворицата осомничени, а за случајот ќе одлучува судија на претходна постапка во Основниот кривичен суд Скопје.
Истрагата е во почетна фаза, а се очекуваат дополнителни информации од Обвинителството и Финансиската полиција.