Мобилен царински тим од Одделението за оперативни работи запленил поголема количина пури во вредност од 4.000 евра при контрола на автобус на влез во државата на граничниот премин Табановце.
Против возачот на автобусот, македонскиот државјанин К.Б., е поднесена кривична пријава до Основното јавно обвинителство Куманово за кривично дело криумчарење.
Според соопштението на Царинската управа, при детална контрола на автобусот, под седиштата и во фабричка шуплина биле пронајдени вкупно 312 парчиња пури од различни производители.
Проценката за избегнати давачки изнесува 174.900 денари. Акцизните производи се запленети и по наредба на Обвинителството ќе бидат предадени на Агенцијата за управување со одземен имот.
Царинската управа продолжува со засилени контроли со цел спречување на нелегална трговија со акцизни производи, заштита на финансиските интереси на државата и здравјето на граѓаните.