Едно лице се здоби со минимални изгореници во пожарот што денеска избувна меѓу селата Долани и Љуботен во Општина Штип, информираат од Центарот за управување со кризи. На повреденото лице веднаш му е укажана медицинска помош од екипа на Итната медицинска помош, а според досегашните информации нема други повредени.
По пријавата за пожарот во атарот на селото Долани, Територијалната противпожарна единица од Штип интервенирала со две екипи. Од страната кон селото Долани, со помош на трактори се изорани заштитни појаси, по што огнот е ставен под контрола и изгаснат, со што е спречена опасноста од негово ширење кон населеното место.
- „Во моментов пожарот се шири во правец кон селото Љуботен, каде што се зафатени сува трева, нискостеблеста вегетација и борова шума“, се вели во соопштението од ЦУК.
Во акцијата за гаснење и локализирање на пожарот учествуваат едно противпожарно возило, три противпожарни џипови и 10 пожарникари, како и работна машина (скип) од ЈП „Стипион“ – Штип, четири трактори, полициски службеници и екипи на Итната медицинска помош.