Вработен во ЈП „Комуналец“ – Гостивар загина при чистење на одводни канали во атарот на селото Горно Јеловце, соопштија од СВР Тетово.
На 15 јуни, во 12:47 часот, до полицијата била пријавена информација дека во воден канал има починато лице. Полициските службеници излегле на терен и утврдиле дека станува збор за Н.М. (64) од селото Дебреше, вработен во ЈП „Комуналец“ – Гостивар.
Според првичните информации, тој заедно со колеги бил на локација со одводни канали за прибирање на проточни води. За време на работните активности, се заглавил во еден од каналите.
Екипа на Територијалната противпожарна единица – Гостивар го извлекла од каналот, а лекар од Итната медицинска помош констатирал смрт.
По наредба на јавен обвинител, телото на починатиот е предадено на обдукција.
Надлежните служби спроведуваат истрага за целосно утврдување на околностите.