Непријатен инцидент се случил вечерва на популарната плажа во грчкото туристичко место Пефкохори на Халкидики, кога жена била нападната од рибата зајак, позната и како лагокефалос.
Според нејзиниот исказ за грчката телевизија ANT1, таа влегла во водата која ѝ била до колена кога одеднаш почувствувала силна болка во ногата. „Реков: ‘Нешто ме гризе и не ме пушта’. Погледнав надолу и видов огромна риба“, раскажала таа.
Жената истакнала дека веднаш ја препознала рибата бидејќи претходно била информирана за нејзиното присуство. Во паника почнала да ја тресе ногата за да се ослободи, а потоа излегла од водата во солзи. Нејзините пријатели исто така излегле од морето за да ѝ помогнат.
За среќа, каснувањето било во пределот на глуждот, каде коската спречила подлабоко продирање на забите. Сепак, рибата ѝ оставила голема и видлива рана. Присутните на плажата ѝ укажале прва помош, го запреле крварењето, а потоа била пренесена во локален здравствен центар, каде примила серум против тетанус, антибиотици и соодветна обработка на раната.
Грчкиот Црвен крст претходно предупреди за зголеменото присуство на лагокефалосот во грчките води. Оваа риба, позната и како риба-пуфер, се смета за еден од најинвазивните видови во Средоземното Море. Таа поседува многу силни вилици и остри заби кои можат да предизвикаат сериозни повреди. Експертите сметаат дека нејзиното сè почесто појавување во Егејското и Јадранското Море е резултат на промените на температурата на морската вода.