Демократската унија за интеграција денеска објави дека најновите податоци од Министерството за внатрешни работи, покажувале сериозен пад на застапеноста на Албанците во полицијата.
„Од 549 нови примени полицајци, помалку од 40 се Албанци. Ова претставува околу 7 проценти од вкупниот број.
Истата диспропорција беше забележана и за време на прославата на Денот на полицијата. Од 30-те полицајци одликувани како најдобри, само еден беше Албанец.
Овие два податоци даваат јасна слика за насоката што ја зеде кадровската политика во Министерството за внатрешни работи“ велат од ДУИ..
Оттаму додаваат дека полицијата беше една од главните институции каде што Охридскиот договор донесе длабока промена во застапеноста на Албанците. Фер и соодветна застапеност беше воспоставена како уставен стандард токму за да се обезбеди дека државните институции го одразуваат мултиетничкиот карактер на земјата.
Денес, 25 години по Охридскиот договор, податоците од МВР покажуваат назадување во овој процес.
Помалку од 40 Албанци од 549 нови полицајци и само еден Албанец од 30 одликувани полицајци се конкретни показатели за оваа политика.
ДУИ ќе продолжи да го следи „секој конкурс, унапредување и назначување во Министерството за внатрешни работи и другите државни институции, како и да објавува секој случај на кршење на фер и соодветна застапеност“. велат од ДУИ. /