Со теоретски исклучок на Црна Гора сите земји од Западен Балкан немаат реална перспектива за зачленување во Европската Унија анализира Михаел Мартенс, дописник на „Франкфуртер алгемајне цајтунг“ за Источна Европа.
Мартенс во контекст на смртта на Ратко Младиќ и откажувањето на посетата на Белград од страна на еврокомесарката за проширување Нарта Кос го анализира процесот на проширување на ЕУ.
Дописникот на ФАЗ смета дека Белград не го интересира што мисли Марта Кос за Младиќ и Србија затоа што Вучиќ знае дека неговата земја нема никакви шанси за членство во ЕУ.
,,Едно треба да се каже уште на почетокот: раководството на Србија има реално разбирање за тоа што значи, а што не значи процесот на европска интеграција. Во Белград совршено добро знаат дека членството во Европската унија не е на маса за Србија. Тоа важи без оглед на тоа кој ја управува земјата. Србија би можела да биде предводена од Мајка Тереза и Нелсон Мандела, а сепак да нема шанси да стане полноправна членка на ЕУ. Истото се однесува и на сите други држави од Западен Балкан, со можен исклучок на Црна Гора”, анализира Мартенс.
Некои извори тврдат дека високите пречки за прием на нови членки во Франција би можеле некако да се надминат во случајот на Црна Гора, но тоа останува неизвесно. За останатите земји перспектива за членство практично не постои. За Република Молдавија шанса би можела да има само преку повторно обединување со Романија – перспектива која, сепак, не ужива мнозинска поддршка кај Молдавците, вели Мартенс.
,,Европската иднина на Србија, според тоа, не се однесува на членство во ЕУ, кое и онака не е реално. Може, пак, да се однесува на потенцијално пристапување кон единствениот европски пазар.
Во меѓувреме, смртта на Ратко Младиќ – или поточно начинот на кој властите во Србија се справија со неа – во последните денови доведе до тензии меѓу Србија и Хрватска. На погребот закажан за понеделник во Белград за еден од најгрозоморните воени злосторници што Европа ги има видено од 1945 година, се очекува да присуствуваат неколку десетици илјади ожалостени, приближно колку што биле убиени по негова наредба.
Хрватската влада предупреди дека ставот на Белград на крајот би можел да ги блокира веќе застојаните европски амбиции на Србија. Сличен став изрази и Марта Кос, комесарката на ЕУ за проширување, која доаѓа од Словенија”, се вели во анализата.