„Независноста е чувство на припадност, љубов кон татковината и одговорност кон иднината. Таа е обврска да го зачуваме она што ни е оставено и со достоинство да го предадеме на генерациите што доаѓаат, порачаа по повод денешниот голем празник од владејачката партија.
„Македонскиот јазик, македонската песна и македонската традиција се дел од приказната што се раскажува низ векови. Македонското знаме е симбол во кој се вткаени нашата историја, нашите корени, спомените на генерациите пред нас и надежите на генерациите што допрва ќе дојдат.
Македонија е наш дом, наш корен и дел од секој од нас.
Да ја сакаме, да ја чуваме и со дела да придонесуваме за нејзината иднина. Нека Македонија биде земја во која младите ќе остануваат затоа што тука го гледаат својот сон. Земја во која секое семејство ќе има причина да верува во подобро утре. Да ја чуваме Македонија со љубов, да ја градиме со дела и да ја оставиме посилна на оние што доаѓаат по нас.
Нека е честит 8 Септември, денот на независноста“, порачаа од ВМРО-ДПМНЕ.