Во Основниот кривичен суд Скопје денеска треба да продолжи судењето за случајот „Државна лотарија“, откако минатата недела на истражните органи во земјава им се предаде првообвинетиот Перпарим Бајрами, поранешен директор на Државната лотарија.
Откако побегна од земјава, за Бајрами беше распишана меѓународна потерница. На 9 септември тој сам се предаде на граничниот премин „Блаце“, по што беше спроведен во затворот во Скопје на издржување на претходно определената мерка притвор.
Покрај Бајрами, во случајот се обвинети и поранешниот вицепремиер Артан Груби, Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
На судењето што почна изминатата недела сите обвинети се изјаснија дека не се чувствуваат виновни, освен Бајрами, кој на првото рочиште сѐ уште беше недостапен за органите на прогон, и обвинетиот Башким Авдиу, кој изјави дека не го разбира обвинението што му се става на товар и побара да му биде доставено писмено на неговиот мајчин, албански јазик.
Обвинението, кое го застапуваат јавните обвинители Даниел Коцев и Александар Давчевски, се однесува на дејства преземени во текот на 2023 и 2024 година, со кои обвинетите ги пречекориле службените овластувања и предизвикале штета на „Државната лотарија“ во износ од 596.125.511 денари.