Локалните медиуми кај јужниот сосед на Македонија известуваат дека 82-годишен маж починал откако се впуштил во тепачка со маж во своите седумдесетти години поради лежалка на плажа во Грција.
Сведоци велат дека несогласувањето околу користењето на лежалките на плажата Вулиагмени, во близина на Атина, прераснало во физичка пресметка, во која подоцна се вклучиле и други луѓе.
Очевидец изјавил за весникот „Катимерини“ дека ситуацијата била толку хаотична, што врисоците можеле да се слушнат до другиот крај на плажата.
Помладиот маж, кој имал 76 години, наводно е уапсен. Приведена била и 21-годишна жена која била со него, но подоцна била пуштена на слобода. Сведоци изјавиле за дневниот весник „Та Неа“ дека таа имала крваво и отечено лице.
За време на тепачката, 82-годишникот колабирал. Според различни извештаи, пред да пристигне брзата помош, му била укажана помош преку кардиопулмонална реанимација (CPR) и бил употребен дефибрилатор. Мажот бил пренесен во болница, каде што подоцна починал.
Друг сведок изјавил дека жртвата изгледала како да чека други луѓе и дека имала резервирано лежалка, што се чини дека било причина за првичната расправија.
Надлежните органи истражуваат што довело до физичката пресметка и што ја предизвикало смртта на мажот.