Безбедносно-информативната агенција (БИА) остро ги отфрли тврдењата за наводен таен надзор и незаконско постапување, оценувајќи дека станува збор за обид за дестабилизација на Србија и уривање на уставниот поредок.
Во соопштението на Агенцијата се наведува дека сите „лажни, тенденциозни и злонамерни тврдења“ за наводно незаконско работење на БИА се отфрлаат како злонамерно осмислени, со единствена цел дополнително да ги нарушат веќе кревките безбедносни прилики во земјата и да го урнат уставно утврдениот поредок.
Од БИА истакнуваат дека и во најтешките времиња работата на Агенцијата ја носеле чесни луѓе кои својот живот го посветиле на заштитата на Република Србија и нејзините граѓани. Сите активности, како што се наведува, се спроведуваат со строго почитување на Уставот и законите.
„И покрај сите обиди на експоненти на странски служби и групи за притисок, БИА и во иднина ќе постапува исклучиво во насока на заштита на уставниот поредок, безбедноста на Република Србија и нејзините државни интереси“, се вели во соопштението.
Од Агенцијата потсетуваат дека нејзиниот делокруг е јасно дефиниран со Законот за БИА и другите релевантни прописи.
Истовремено предупредуваат дека сите оние кои преку деструктивно и антидржавно дејствување вршат кривични дела „можат со сигурност да сметаат дека секогаш ќе бидат предмет на работа на БИА“, како и дека Агенцијата континуирано доставува информации до надлежните органи во согласност со законот.