Инфлацијата во еврозоната се искачи на 2,1 отсто во август, покажаа најновите податоци од статистичката агенција Евростат во вторник.
Економистите анкетирани од Ројтерс очекуваа стапката да остане непроменета од јули на 2%.
Основната инфлација, која ги исклучува волатилните цени на енергијата, храната, алкохолот и тутунот, остана стабилна на 2,3% веќе четврти месец по ред. Овие податоци, според аналитичарите, укажуваат дека основните ценовни притисоци сè уште постојат, но не се интензивираат до ниво што би предизвикало итна реакција од страна на ЕЦБ, објави Euronews.
На месечно ниво, цените пораснаа за 0,2%, што е подобрување во однос на рамниот резултат од јули. Интересно е што некои клучни компоненти на инфлацијата бележат знаци на стабилизација – цените на храната, алкохолот и тутунот пораснаа за 3,2% на годишно ниво, нешто пониско од 3,3% во јули, додека инфлацијата кај услугите благо се олади и се спушти на 3,1%. Цените на индустриските производи без енергија останаа непроменети на 0,8%, а енергенсите продолжија да поевтинуваат, но со послаб интензитет – пад од 1,9% во споредба со 2,4% минатиот месец.
Разликите меѓу земјите-членки на еврозоната остануваат значителни. Естонија ја бележи највисоката инфлација со 6,2%, следена од Хрватска со 4,6%, додека на другата страна Франција и Кипар имаат најниски стапки – 0,8% и -0,1% соодветно. Белгија се истакна со скок на цените од 1,5% месечно, додека неколку земји, меѓу кои Грција, Литванија, Финска, Латвија, Италија и Португалија, забележаа месечна дефлација.
Европската централна банка, која на последниот состанок во јули реши да паузира со намалувањето на каматните стапки по осум последователни кратења, сега внимателно го следи развојот на инфлацијата. Претседателката Кристин Лагард тогаш изјави дека ЕЦБ е „на добро место“, но предупреди на потенцијални ризици поврзани со трговските политики и глобалните синџири на снабдување. Со оглед на стабилната инфлација и рекордно ниската невработеност во еврозоната од 6,2%, пазарите не очекуваат промена на каматната стапка на претстојниот состанок на Советот на гувернери на 10 септември. Стапката на депозитите најверојатно ќе остане на 2%, додека ЕЦБ продолжува со внимателниот пристап.
Во меѓувреме, европските пазари се соочија со пад поради зголемената политичка нестабилност, особено во Франција и Холандија. Германскиот индекс DAX падна за 1%, спуштајќи се под психолошката граница од 24.000 поени – ниво кое не е видено од почетокот на август. Индексите FTSE MIB (Италија) и IBEX 35 (Шпанија) исто така се намалија, додека францускиот CAC 40 остана релативно стабилен.
Поширокиот Euro STOXX 50 индекс се намали за 0,5%, а Euro STOXX 600 за 0,6%. Одделни компании покажаа различни резултати – LVMH забележа скок од 3,2% откако HSBC ја зголеми својата целна цена за акцијата, додека Siemens падна за 2,9%, а ASML за 2%.
На девизниот пазар, еврото ослабе за 0,7% во однос на доларот, достигнувајќи курс од 1,1630 долари, што го одразува зголемениот интерес на инвеститорите за посигурни валути. Истовремено, благородните метали доживеаја драматичен раст – златото за првпат ја надмина границата од 3.500 долари за унца, а среброто се искачи над 40 долари, што е највисоко ниво од септември 2011 година.