Управата за јавни приходи прави напор за да легнат парите кај граѓаните од „МојДДВ“. Велат дека исплатата треба да заврши оваа недела, но можеби ќе се пролонгира и следната. Законскиот рок за поврат на ДДВ кај лицата кои скенираат фисклани сметки истече пред два дена.
- „Во процесот на исплата кај некои од спецификациите се појави технички проблем, кој бара нивна целосна преработка. Имено, доколку постои дури и само еден налог, каде што се појавува корисник со промена на банка или трансакциска сметка, целата пратка системски се враќа и средствата не се исплаќаат кон сите корисници што се во ист налог како и корисникот што извршил промена. Овој предизвик е веќе идентификуван и надлежните служби работат на негово надминување. Целта е да се обезбеди точна и правична исплата за сите граѓани, без исклучок“.
Од Управата појаснуваат дека исплатата за корисниците со валидни и потврдени податоци е во тек, а за преостанатите ќе биде реализирана веднаш по завршување на техничката преработка.
За доцнењето, од Управата информираа дека станува збор за технички проблем, затоа што некој од корисниците сменил банка или трансакциска сметка, па целата пратка системски се враќала и парите не се исплаќале кон корисниците кои се во ист налог.
Како најново, појаснуваат дека се изготвени налози за поврат кај над 155 илјади корисници, вредни 4,4 милиони евра, но без прецизен одговор кога ќе заврши исплатата.
- Останува симболичен износ кој може да се појави како разлика доколку некој од налозите не биде успешно реализиран поради неточни податоци односно порди корисник кој нема точни податоци во системот на УЈП. Исплатата е во тек. Средства во буџетот има и нема место за сомнежи или било каков страв дека нема да ги добијат средствата за скенирани фискални сметки.
За третиот квартал фисклани сметки скенирале над 515 илјади корисници. Инаку, во последните 6 години, од кога се воведе проектот пракса беше парите да се исплаќаат до 10-ти, најдоцна до 15-ти по истекот на 60 дена од завршување на кварталот од годината.