Секој што ги злоупотребил парите од ИПАРД програмата ќе одговара – од прв до последен. Ова е ставот на премиерот откако државата времено ја прекина исплатата на парите од европските фондови, додека трае истрагата за корупцијата во платежната Агенција. Одлуката ја поздрави Европската Унија. Мицкоски рече дека тој побарал да се блокираат парите за да се види до каде оделе злоупотребите.
„Да, јас тоа го побарав затоа што мораме да видиме до каде одат злоупотребите, затоа што првичните информации велат дека не е тоа само од сега туку дека и наназад е правено. Така што, сè ќе истражиме и секој што мисли дека така ќе помине се лаже. Има да одговараат сите од прв до последен, кој сака нека е“, рече Мицкоски.
Од друга страна, социјалдемократите тврдат дека исплатите на ИПАРД не може ниту законски ниту процедурално да ги стопира ни претседател на влада, ни министер ни партија, туку тоа може да го направи само националниот овластен службеник за авторизација (НОА), институција што дејствува во рамките на Министерството за финансии, но работи независно, според европски пропишани правила и стандарди.
Исплатите од ИПАРД не може да ги стопира премиерот, тоа е санкција од европскиот систем на контрола, велат од СДСМ.
Од земјоделските здруженија го поздравија потегот на државата, оти како што велат, не било фер некој да печали врз грбот на земјоделците.
Од Основното јавно обвинителство велат дека овој предмет се водел три месеци, каде имало повеќе обвинети. Државниот јавен обвинител Љупчо Коцевски избегна директно да ја коментира изјавата на премиерот Христијан Мицкоски, кој денеска имплицира дека злоупотреби со ИПАРД-програмата немало само сега, туку оти вакви дејствија имало и претходно кои, како што кажа, ќе бидат истражени.
Одговарајќи на новинарско прашање, Коцевски се осврна на истрагата што Основното јавно обвинителство за гонење организиран криминал и корупција (ОЈО ГОКК) ја отвори против актуелниот директор на Агенцијата за финансиска поддршка во земјоделството и руралниот развој и уште четири лица за давање и земање поткуп.
Во таа насока, државниот јавен обвинител потсети дека за неколку обвинети е определен притвор во рамките на истрагата, додека за други детали во овој момент не може да сподели детали.
Од Владата велат дека наскоро Агенцијата за финансиска поддршка во земјоделството ќе има нов директор.
ИПАРД програмата за помош за рурален развој, почна во 2021 и ќе трае до 2027 година, за што се користат 128 милиони евра, од кои 97 милиони се од ЕУ, а остатокот е од државниот буџет.