Вчеравечер, претседателката Гордана Сиљановска-Давкова присуствувала на второто издание на меѓународниот фестивал „Гласот на гајдата“, во организација на Стефче Стојковски, каде што се сретнала македонските и светските мајстори на овој древен инструмент.
,,Гајдата е дел од нашата песна, оро и празнување, неразделна од фолклорот и културната самобитност во кои се олицетворени нашите обичаи и творештво.
Не случајно, во 2024 година традиционалната изработка и свирењето на гајда беа впишани на Репрезентативната листа на нематеријалното културно наследство на човештвото на УНЕСКО.
Различните музички традиции прозвучеа една покрај друга, а македонскиот мелос ја покажа својата препознатливост во поширокиот културен дијалог со светот”, објави претседателката изразувајќи благодарност до Стефче Стојковски и до сите уметници кои со својата посветеност ја пренесуваат оваа традиција до младите, потврдувајќи дека таа може да опстои само ако продолжи да се изучува и да се изведува.
