Албанскиот премиер Еди Рама смета дека ветото не служи никому и само создава проблеми на евроинтегративниот пат, посочувајќи го примерот со трите блокади на неговата земја пред почетокот на преговорите, па и да стане членка на Европската унија, Албанија нема да ѝ стави вето на Македонија, порача тој.
Одговарајќи му на студент од Скопје на кампот со млади луѓе во Јал, кој го праша дали доколку Албанија стане дел од ЕУ ќе ѝ стави вето на Македонија за да ги гарантира правата на Албанците таму, Рама нагласи дека тоа не би го направиле никому.
„Албанија нема да наметне вето никому и никаде. Албанија има секаков интерес работите во РСМ да се одвиваат што е можно помазно, Албанија има секаков интерес односите меѓу двата државотворни народа на Северна Македонија, Албанците и Македонците, да бидат братски и односи на хармоничен соживот. Постигнат е голем напредок. Демократијата не е прошетка по асфалтиран булевар, туку е пат што има свиоци и пресврти. Има подеми и падови, има моменти на тешкотии, но, што се однесува до нас, ние ѝ го посакуваме најдоброто за Република Северна Македонија. Отсекогаш сум бил на мислење дека ветото во процесот не му служи никому. Тоа е заложништво и во суштина неконструктивно и некорисно за приближување на земјите кон ЕУ. Да се наметне вето на патот кон отворање преговори, а не нивно отворање, за преземање на овој чекор, не е европско“, рече Рама.
„Албанците мора да бидат многу внимателни да не се однесуваат како крава што го клоца млекото собрано со жртви, со многу труд на трите главни територии, во нашите две држави и во РСМ, каде што сме државотворно население. Не сме ние тие што треба да ги земаме тапаните на национализмот. Мораме да бидеме благодарни за оние што придонесоа и мора да продолжиме да се радуваме што ќе бидеме нежно јагне што цица од две мајки, а не кози што никој не ги сака дури ни на ридовите зад куќата“, додаде тој.