Решен сум да воведам ред во главниот град, а тоа неизбежно подразбира и казнување на прекршителите. Досега изрековме над четириесет казни и ќе продолжиме сè додека целосно не ги изолираме овие девијантни појави, изјави градоначалникот на Скопје, Орце Ѓорѓиевски, по завршувањето на 72-часовната акција за чистење на метрополата.
Тој откри дека при преземањето на функцијата затекнал само шеснаесет функционални камиони во ЈП „Комунална хигиена“, поради неплатени долгови за сервисирање. Во интервју за ТВ Сител, Ѓорѓиевски пофали дека сервисерите излегле во пресрет, па сега на терен работат над четириесет оперативни машини, а во наредните денови се очекува бројот да достигне шеесет, со што претпријатието конечно ќе биде целосно оперативно. Со премиерот е договорено и набавка на нови возила.
„Граѓаните редовно плаќаа во изминатиот период, но, за жал, не ги добиваа услугите за кои плаќаа. Мојата задача е, без оглед на изворот на проблемот, да најдам брзо и ефикасно решение. Само така ја сфаќам довербата што ми ја укажаа граѓаните“, рече Ѓорѓиевски.
Во соработка со општествено одговорни компании, по течението на Вардар ќе бидат поставени заштитни мрежи за спречување на загадување на речното корито – практика присутна во многу европски метрополи, а која, според градоначалникот, не го нарушува живиот свет. Тој повика и централните институции, како Министерството за животна средина и просторно планирање, да се вклучат во санкционирањето, бидејќи само Град Скопје не може да го реши проблемот.
Градежните активности ќе започнат по зимата, а до тогаш приоритет ќе биде расчистување на парковите и депониите.
„Вардариште конечно се расчистува – во тек е процес на одгасување. Девијантните практики од минатото ќе останат зад нас. Никој повеќе нема да биде сведок на тие слики, ниту народот ќе се труе со децении, како што тоа, за жал, беше случај. Ист третман ќе добијат и останатите жаришта – Визбегово, Шуто Оризари, Лепенец и другите“, најави Ѓорѓиевски.
За загадувањето на воздухот рече дека решението не е едноставно и дека зависи од сите нас. Во наредниот период ќе се работи на проширување на топлификациската мрежа, а со експерти се консултира и за преработка на отпадот во „Дрисла“ како едно од клучните жаришта.
Градоначалникот останува на ставот дека ЈП „Комунална хигиена“ треба да биде расформирано и поделено по општини според бројот на жители.
„Но сега не сме подготвени за тоа – механизацијата е недоволна и би предизвикале хаос. Идејата не ја отфрлам, но прво мора да ги зајакнеме капацитетите. Ќе изградиме силни, самоодржливи јавни претпријатија во служба на граѓаните“, истакна тој.
За јавниот превоз, Ѓорѓиевски откри дека постоела одлука за вклучување на околу двесте автобуси на приватните превозници, но квотата не била исполнета – во оптек биле само четириесет до педесет. Возниот парк на ЈСП е десеткуван: моментално работат 160 автобуси, а потребни се најмалку 270 за нормално функционирање без доцнења.
Долгот на ЈСП кон приватните превозници изнесува околу три милиони евра. Средствата се обезбедуваат, а начинот на исплата ќе биде договорен.
Обновата на возниот парк е во тек: во март преку Владата и Министерството за транспорт пристигнуваат осумдесет еколошки автобуси за Скопје, а уште седумдесет за останатите градови.
Во петок Град Скопје ќе одржи седница за буџетот. Ѓорѓиевски очекува реализација на проектите благодарение на апсолутното мнозинство во Советот и изрази подготвеност за соработка.
„Советниците во мене не треба да гледаат непријател, ниту јас во нив. Заедно треба да работиме за што повеќе проекти во интерес на граѓаните“, додаде градоначалникот.