– Наградата ѝ се доделува на Брaсинга за нејзиното севкупно поетско творештво, а врз основа на високите естетски вредности, влијанието на нејзиниот поетски опус и исклучителниот придонес во современата европска и светска поезија – рече на денешната прес-конференција во Македонската академија на наукити уметности, в.д. директорот на „Струшките вечери на поезијата“, Никола Кукунеш.
– Поезијата на Анеке Брасинга се одликува со исклучителна јазична инвентивност. Критиката често ја опишува како „волшебник на јазикот“. Анеке Брасинга се вбројува меѓу најзначајните современи поети на холандската литература и меѓу највлијателните европски поетски гласови на нашето време. Токму поради таа оригиналност и духовна сила, нејзиното дело е високо вреднувано со најзначајните книжевни признанија во холандската литература, потврдувајќи ја како еден од најзначајните поетски гласови на современата европска и светска поезија – се истакнува во образложението за прогласувањето како лауреат на „Струшките вечери на поезијата“.
По повод наградата, Брaсинга испрати писмо, во кое ги искажа честа и големото изненадување за доделувањето на „Златниот венец“. – Длабоко сум трогната од ова високо признание, а уште повеќе што сум првата холандска поетеса на која ѝ е доделена оваа награда. Тоа ми дава чувство како да е одликувана целата холандска поезија со овој венец – и од минатото и од сегашноста – вели Брaсинга во писмото.
Таа посочи и дека е благодарна што ќе учествува на прочуениот меѓународен струшки фестивал и се надева дека ќе го носи „Златниот венец“ со достоинство. – Особено ме исполнува со радост и благодарност сознанието дека дел од мојата поезија се преведува и ќе биде објавена на македонски јазик. И, конечно, ќе ми биде големо задоволство во Охрид да ги посетам споменикот и музејот посветени на писателот А. ден Долард. Тој живеел во едно село недалеку од моето родно место, во шумите на Велуве во источна Холандија и токму тој на холандските читатели им го откри прекрасниот свет на Македонија. А јас уште од детството бев еден од тие читатели – вели годинашната лауреатка во писмото.
На објавувањето на годинашната добитничка на „Златниот венец“ на СВП во МАНУ, присуствуваше и министерот за култура, Зоран Љутков. – На мостовите на Дрим застанале поетски големини… Имиња што се пресвртници во историјата на поезијата. Денес името на Анеке Брасинга го збогатува тој престижен пиедестал, не како додаток, туку како логично продолжение на таа низа.– истакна министерот.
Анекe Брасинга е родена на 20 август 1948 година, во Шарсберген. Како поетеса неформално дебитирала во 1985 година. Нејзините песни се преведени на германски, француски, англиски, руски, унгарски и на шпански јазик. По прогласувањето на добитникот на наградата „Златен венец“, во МАНУ продолжи и одбележувањето на Светскиот ден на поезијата, 21 Март, со читање поезија од повеќе македонски поети.