Независниот синдикат при Јавното претпријатие „Паркови и зеленило“ – Скопјe најави протест поради неисполнети обврски кон вработените.
Платата за месец август им била исплатена само на вработените во „Паркови и зеленило“, додека вработените во фирмите ќерки „Флораком“ и „Луна“ се уште не го добиле својот надоместок.
Во соопштение до јавноста, синдикатот информира дека протестот ќе се одржи денес и утре од 09:30 до 11:00 часот, при што ќе биде блокиран просторот кај семафорот на раскрсницата на булеварот „Илинденска“ и улицата „Никола Тесла“.
Протестот ќе заврши пред управата на Јавното претпријатие „Паркови и зеленило“.
Синдикатот наведува дека протестот е организиран во согласност со законските прописи и колективниот договор, во кој се утврдени правата на вработените на плата, регрес, јубилејни бонуси, новогодишни бонуси и надомест за раскинување на договорот за вработување.