Поранешниот градоначалник на Карпош, Стевчо Јакимовски, ќе побара да му биде одложено извршувањето на казната затвор од една година за кривичното дело „бесправно градење“ поради здравствени проблеми.
На средба со новинарите денеска тој се пожали дека сè уште не ја добил пресудата од Апелацискиот суд за потврда на одлуката на Кривичниот, кој во четвртокот го известил дека на 2 јули мора да се јави во затворот „Скопје“ во Шуто Оризари.
„Целта им е како-така да ме пикнат во затвор, а потоа од сето тоа да прават перформанси“, рече Јакимовски, повикувајќи го Врховниот суд „да се одважи и да го земе овој предмет во обработка и да покаже дека во оваа држава има барем еден суд којшто е спремен да одолее на притисоци од власта и дека во оваа држава има правда“.
Некогашниот министер и лидер на ГРОМ треба да доотслужи уште околу седум месеци затвор, бидејќи во казната за бесправно градење на бараката што 13 години беше седиште на општината до изградбата на новата опшптинска зграда му е пресметано и времето поминато во притвор.
„Ова е прв и единствен случај некој во Македонија да оди во затвор за дивоградба“, изјави Јакимовски.