„Со големо чувство на одговорност денеска ја преземам функцијата градоначалник на Кичево. Мојата цел е да изградиме локална самоуправа, што ќе биде блиска до граѓаните, отворена за идеи и решенија и која ќе ги слуша сите, без разлика на политичка, етничка или верска припадност. Сите се поддеднакво важни!“ – порача попладнево во својата објава на фејсбук на македонски, албански и турски јазик д-р Александар Јовановски, по победата во вториот круг на локалните избори во општина Кичево. Тој го презеде раководењето со градот и општина Кичево од Фатмир Дехари, кој 12 години беше на оваа позиција.
„Оваа должност не ја гледам како привилегија, туку како обврска пред граѓаните да работам посветено, отворено и во интерес на сите. Нашиот град има потенцијал и вредни луѓе, има визија за подобра иднина. Верувам дека со заедничка работа, искрен дијалог и посветеност ќе создадеме поубав, поправеден и поуспешен град за сите нас и за идните генерации. Да продолжиме напред заедно, за мене не постојат поделби. Ќе се водиме по остоинствен живот за сите!“ – нагласи градоначалникот на Кичево Јовановски, исто така, на општествената мрежа.
Информативниот портал „Алмакос“ и други медиуми на албански јазик во Македонија објавија: Денес во просториите на општина Кичево беше одржано примопредавање на градоначалничката функција меѓу Фатмир Дехари и Александар Јовановски. Новиот градоначалник Јовановски беше пречекан во канцеларијата од досегашниот градоначалник Фатмир Дехари, кој го информираше Јовановски за започнатите и потпишаните проекти, кои според Дехари, изнесуваат 7 милиони евра капитални инвестиции.
„Од оваа говорница ви ветувам чесна, вредна и посветена работа, за да ги реализираме сите проекти, што ги ветивме. Ќе се обидам да имам добра соработка со сите вработени и да ги исполнам очекувањата на нашите граѓани, како што се хигиената и проектите, што ги ветивме.“ – изјави Јовановски.
Општинската изборна комисија им ги додели уверенијата на општинските советници и на новиот градоначалник на Општината Александар Јовановски. Новиот состав на Советот на општината е составен од 19 советници: 5 советници се од коалицијата Национална алијанса за интеграција, 3 советници се од коалицијата Вреди, 2 советници се од независниот кандидат, 8 советници се од ВМРО-ДПМНЕ и 1 од СДСМ. – објави „Алмакос“.