Адвокатот Драган Пешевски, кој директно беше вклучен во постапката за „27 април“, кој поднесе, а не доби поддршка за Закон за амнестија за овие луѓе да излезеа на слобода, во интервју за МКД.Мк вели дека судијката Добрила Кацарска, со изборот за уставен судија по изрекувањето на високите затворски казни беше наградена.
„Награда. Таа учествуваше во руинирањето на правосудството и ја ставија претседател на Уставен суд. Ми се чини дека целиот народ ѝ е гневен на Добрила Кацарска бидејќи сите знаат дека луѓето се неправедно осудени“, вели Пешевски.
„Кацарска се обиде на секој можен начин да ја саботира одбраната на обвинетите, а и да се изживува врз адвокатурата како фела. На едно од рочиштата се расипа опремата во новиот Кривичен суд, па нѐ префрлија во големата судница во старата зграда на истиот суд.
Таму немаше услови за одржување рочиште со над 100 присутни. Тогаш требаше да се сослуша заштитениот сведок, кој беше круцијален сведок во постапката, а ние да го испитуваме. Но неговиот исказ требаше да се запишува, а маси немаше. Побаравме маса или простор да може да запишуваме, судијката Кацарска ни рече да коленичиме и да запишуваме за колена. Не прифативме и сите адвокати си заминавме, па бевме казнети со сума од по 1.000 евра.
Ова е само еден пример како се газеше одбраната на обвинетите“ сведочи адвокатот Пешевски.